Чэмпіён краіны ў рэжыме online Андрэй Малюш, якога летась праз інтрыгі не ўзялі на сусьветную шахматную алімпіяду, зладзіў перад Калядамі на сайце "Беларускія шахматы" прэс-канфэрэнцыю.

Пытаньняў да прапаршчыка міліцыі было шмат - як шахматных, так і жыцьцёвых. Пры канцы прэс-канфэрэнцыі А. Малюш выклаў свае прапановы да нечарговага зьезду фэдэрацыі шахмат (пройдзе 29 студзеня) ды падзяліўся ідэяй аб зборы сродкаў на буклет пра ўсіх, цягам 70 гадоў, чэмпіёнаў Беларусі па шахматах.

Ад віртуальнай прэс-канферэнцыі выйграў і сайт bychess.info, які на працягу двух год на ўласныя сродкі падтрымлівае малады праграміст з Горадні, выпускнік БДУ Павал Макевіч.

Некаторыя пытаньні і адказы з форуму "Беларускіх шахмат":

- Хто найбольш небясьпечны праціўнік у фінале?
- На жаль, склад Вышэйшай лігі яшчэ ня вызначаны. Зь Першай лігі наймацнейшы - Юра Ціханаў.

- Хто мае найбольш рэальныя шанцы стаць новым чэмпіёнам?
- Кожны з гросмайстраў і Андрэй Жыгалка будуць змагацца за чэмпіёнства. А шанцы перад першым турам ва ўсіх роўныя.

- Ці згодны Вы ў будучыні стаць рэклямным абліччам беларускіх шахмат?
- Звычайна рэклямнае аблічча - дзяўчына. Цяперашняя чэмпіёнка РБ да 20 гадоў - вельмі сымпатычная. Дый удзельніца алімпійскай каманды Беларусі Аня Шарэвіч ужо мае здымкі, якія так і просяцца на вокладку часопіса.