Ёсьць шахматысты, якія ставяць рэкорды творчага даўгалецьця – Зварыкіна, Карчной, Ройзман. Сустракаюцца тыя, хто дае рэкордныя сэансы адначасовай гульні, накшталт адбытага летась у флярыдзкім гандлёвым цэнтры "Gardens mall". Гросмайстарка Сьюзан Полгар 16 гадзін запар гуляла з 326 супернікамі і выйграла 309 партый, упісаўшы сябе ў кнігу рэкордаў Гінэса… А ёсьць шахматныя кампазытары, што ствараюць рэкордныя задачы. Такія задачы таўталягічна называюцца таскамі (task з ангельскай – "заданьне"). Да прыкладу, таск-монстар прадугледжвае мат за максымальную колькасьць хадоў.

З заданьнем "мат за 200 хадоў" яшчэ можна звыкнуцца, а ці часта нам даводзіцца бачыць у адным творы ажно чатыры ракіроўкі? Вось жа, Віктару Волчаку зь Лідчыны, экспэрту Беларускай фэдэрацыі шахмат у галіне кампазыцыі, удалося неверагоднае. Ягоны таск атрымаў I-II прыз на леташнім міжнародным конкурсе – мэмарыяле Езьдзіна (дыягр. 1).

Гэтая пяціхадоўка В. Волчака досыць мудрагелістая, чым і вабіць: 1. de! Th7 2. e7! Te7 3. de i 4. Kf6X; 1…0-0-0 2. Ta7 Kpb8 3. с7+ Kpa7 4. 0-0! і 5. Ta1X; 1…0-0 2. Kh6+ Kpg7 3. Khf5+ Kpg6 4. 0-0-0! і 5. Tdg1X.

У сярэдзіне XX ст. шахматны рамантык з Бразыліі распрацаваў адмысловую тэму, якая цяпер называецца ў яго гонар. Аднойчы берасьцейскі трэнэр Уладзіслаў Каташук – аўтар каля 150 задач – пайшоў бразыльскім шляхам. Паспрабуйце разьвязаць ягоны "таск Валадао" (дыягр. 2). Падказка: у гэтым відзе таску спалучаюцца тры нестандартныя рухі – ракіроўка, узяцьце на праходзе і ператварэньне пешкі ў фігуру.

форум
спiс артыкулаў